<html>
<head>
<meta http-equiv="content-type" content="text/html; charset=utf-8">
</head>
<body text="#000000" bgcolor="#FFFFFF">
<header class="single-header">
<h1 class="entry-title">Bij gelegenheid van Jocus 16 X 11 brengt
Jocus Krijger terug naar Venlo</h1>
<div id="entry-meta" class="entry-meta">
<p id="post-author" class="byline author vcard"> Door: <a
href="https://venlo.nieuws.nl/author/marieke/" rel="author"
class="fn"> Marieke </a> </p>
<time id="published" class="published"
datetime="2018-11-10T00:00:51+00:00"> Datum: <span
class="day">10 november</span> 2018 00:00 </time>
<div id="last-update" class="last-update"> Laatste update:
10-11-2018 00:02 </div>
<div class="social-share">
<div class="share-buttons">
<div class="social-button twitter-sharrre sharrre"
data-url="https://venlo.nieuws.nl/nieuws/50921/gelegenheid-jocus-16-x-11-brengt-jocus-krijger-terug-naar-venlo/"
data-text="Bij gelegenheid van Jocus 16 X 11 brengt Jocus
Krijger terug naar Venlo">
<div class="box"><span class="icon icon-twitter"></span></div>
</div>
<div class="social-button facebook-sharrre sharrre"
data-url="https://venlo.nieuws.nl/nieuws/50921/gelegenheid-jocus-16-x-11-brengt-jocus-krijger-terug-naar-venlo/"
data-text="Bij gelegenheid van Jocus 16 X 11 brengt Jocus
Krijger terug naar Venlo">
<div class="box"><span class="icon icon-facebook"></span></div>
</div>
<div class="social-button linkedin-sharrre sharrre"
data-url="https://venlo.nieuws.nl/nieuws/50921/gelegenheid-jocus-16-x-11-brengt-jocus-krijger-terug-naar-venlo/"
data-text="Bij gelegenheid van Jocus 16 X 11 brengt Jocus
Krijger terug naar Venlo">
<div class="box"><span class="icon icon-linkedin"></span></div>
</div>
</div>
</div>
</div>
</header>
<div class="thumbnail-container">
<div class="thumbnail-lg img-container ratio-3-2 lazy-load"> <img
src="https://cdn.nieuws.nl/media/sites/351/2018/11/09235947/krijger-715x408.jpg"
alt=""></div>
<div class="credits ">Foto: Foto via © Omroep Venlo.</div>
</div>
<p><strong>Beej gelaegenheid van ’t 16×11 jäörig jubileum van
Venloosch Vastelaoves Gezelschap Jocus schink zeej de inwoëners
en bezeukers van de gemeinte Venlo twië kunswerk veur de
aopenbare ruumte.</strong></p>
<p>Op Elf van Elf 2019 wuurt ein groët kunstwerk “D’n Haan” geplaats
aan de Keulse Poort det same mit de Venlose gemeinschap wuurt
gemak en verwiés nao de ’t “Stedje van Lol en Plezeer”, de Venlose
vastelaovend en Jocus. Veuroétlaupend dao-op wuurt op zaoterdaag
15 december 2018 ’t beeld “De Vreedzame Krijger” truukgeplaats op
zien oorspronkelikke plaats op de Kop van Wiërd. De plaatsing van
beide kunstwerke wuurt meugelik gemak door inkele veuraanstaonde
Venlose onderneminge, instellinge, privépersoëne en de Provincie
Limburg in samewerking mit de Gemeinte Venlo en de Stichting
Kunswerk Jocus 16×11.</p>
<p>Dit jaor is ‘t 176 jaar geleeje det Jocus woort opgerich.
Nederlands’ aldste vastelaovesgezelschap viert daomei ein
biezônder vastelaovesjubileum, van waal 16×11 jaor. Ein jubileum
det op 5 oktober jongsleeje ein Keuninklik rendje kreeg door de
oétreiking van de Keuninklikke iërepenning.</p>
<p>Dees feestelikhede zien veur Venloosch Vastelaoves Gezelschap
Jocus aanleiding um de Venlonaere ein geschenk aan te beeje in de
vorm van ein twiëtal kunswerke in de aopenbare ruumte. Bliévende
verbeeldinge van ein ônlosmakelikke verbinding tösse de stad Venlo
en Jocus.</p>
<p>In dit kader haet Jocus enige tiéd geleeje kôntak gelag mit
beeldend kunstenaer Rik van Rijswick en ‘t initiatief genaome um
de truukplaatsing van “De Vreedzame Krijger” op de Kop van Wiërd
te realisere. “De Vreedzame Krijger” zal op 15 december 2018 op
zien oorspronkelikke plaatse truukkômme. Ein initiatief det, gelet
op de reuring die ’t weghaole van ’t beeld 3 jaor geleeje
veroorzaakte, noow door eine breie groep Venlonaere mit vuuël
positiviteit zal waere ôntvange.</p>
<p>In combinatie mit de truukplaatsing van “De Vreedzame Krijger”
zal door Rik van Rijswick in de komende maonde ein niej en
biézonder Vastelaoveskunstwerk waere gemak: “D’n Haan”. Dit betref
ein groët en expressief baeld, ein beeldbepaold objek mit d’n haan
as belangriékste kreatieve oétgangspunt. D’n haan is al sinds 1842
‘t beeldmerk van Jocus en taevens ein krachbiës. ‘t Symboliseert
de krachtige en gruuëtse stad Venlo, die al sinds jaor en daag de
geuzenaam “Stedje van Lol en Plezeer” druëg. ‘t Kunstwerk steit
veur bliejheid en positiviteit van de stad. ’t Wuurt ter
verwelkomming van alle gaste op ein prominente plek aan de Keulse
Paort (richting NS-station) geplaats. Heejdoor steit “D’n Haan”
auk veur de gasvreejheid van Venlo. Door ziene kreatieve aard en
umvang van ‘t kunstwerk, in combinatie mit de locatie zal ‘t ein
herkinbare en beeldbepaolend zien in de Venlose binnenstad.</p>
<p>’t Baeld wuurt gemak mit materiale die waere aangereik door de
maakindustrie van Venlo; de sterke economische motor van de stad.
Vanoét de aangeleverde materiale (beejveurbaeld mechineonderdeile,
glaas, ventilatorblaajer, geetmalle, printeronderdeile en ander
resmetaal) wuurt “D’n Haan” gevormp. ’t Wuurt as ’t waore ein <em>Gesamtkunstwerk</em> waomei
ein verbinding wuurt gelag mit de positiviteit en bliejheid van de
Venlonaere, ’t breie draagvlak veur Jocus en de Venlose
vastelaovend, de maakbaarheid van de stad Venlo en Cradle to
Cradle (“recycle-kuns”).</p>
<p>De ônthölling van “D’n Haan” is veurzeen op 11 november 2019.</p>
<p>Zoëwaal de truukplaatsing van ‘De Vreedzame Krijger’ as de
plaatsing van “D’n Haan” waere meugelik gemak door inkele
veuraanstaonde Venlose onderneminge, instellinge, privépersoëne en
de Provincie Limburg in samewerking mit de Gemeinte Venlo en de
Stichting Kunswerk Jocus 16×11.</p>
</body>
</html>